[2020]畢業恩的小小更新

畢業恩的小小更新

大家好我係 Joash，香港人，啱啱係Uni of Surrey畢業。而家係Guildford做緊野。

如果有興趣不妨follow我IG吖： https://www.instagram.com/joash_guildford/

如果有朋友需要可以聯絡我 joash.lee@friendsinternational.uk

[近況更新] 貳零壹捌 秋季刊

大家好 又係我恩哥啦
首先歡迎各位freshers黎到英國 啱啱開學ge boarding朋友
不論GCSE AL BTEC etc都祝你地好運
同Enjoy你地嘅生活

以下為筆者懶得寫相片放題

===============

呢球角球 一係就入 一係就唔入
[ENG (1)vs(1) ITA 27 Mar 2018, International Friendly]
[Btw 呢球係唔入ge]

條路本喵王嘅 唔準過呀

[River Cam]

呀轆！呀轆你去左邊呀？

Passenger: To infinity and beyond!
Pilot: No we're going to London Heathrow
[LHR, apparently]

[Waterloo Bridge, London]

[The Cathedral Church of the Holy Spirit, Guildford]
[Church of England]

[Lunch for £3.5, Staff Canteen on ____ site ]

無我？你地停哂電啦！
[Cycling path, A1307]

Queen Edith,可能係世界上最好食ge Macaroni cheese
[Queen Edith Pub, CB1 8QN]

死啦唔記得搽moisturiser tim
[Marouane Fellaini, World Cup Semi-Final]

[Whittlesford Park Way train station]

=====分隔線=====

每次都話唔想變季刊 結果每次都係N耐先更新一次
好快咁更新下近況啦
首先呢 呀恩哥我係仲未畢業嘅…
唔係要retake
而係18/19學年係Professional training year
又稱Placement/year long internship
中文簡單D 叫做實習年

用圖解釋好似會簡單D…

一般英格蘭同威爾斯大學嘅本科課程(UG, Undergraduate)
都係3年制學士學位 (Bachelor degree)
如果加埋Placement year 一共4年

部份大學同學科會有另一個選擇 Integrated Masters (綜合碩士？我覺得唔譯好過譯…)
係將UG 3年同PG 1年夾埋做一個4年制嘅本科課程(UG)
如果加埋Placement就總共5年
最常見於Engineering degree MEng
而筆者而家讀緊嘅課程 就係MEng in Aerospace Engineering with Placement year
畢業攞嘅就係  航太工程綜合咖啡碩士學位 (連一年實習)

筆者而家就啱啱開始實習Placement
完成Placement year之後再返Surrey讀埋Final year
就正式畢業啦

=====分隔線=====

差D唔記得 我係讀埋Year 0: Foundation year (Mail list真係寫Year 0)
咦咁咪即係我中六個時個班中一都入大學？

下回預告：實習趣事

其實唔知咩topic不過逼自己出文

[隨筆] 恩哥半年刊 之 球衣收藏

相信唔少球迷死忠 都會有返幾件波衫收藏
身為踢波之人ge小弟
就趁世界盃仲有一個鐘揭幕
同大家分享下波衫收藏啦

無獎問答遊戲：下列波衫只有一件係貴過40鎊(~450蚊) 究竟係邊件？
(下回解答)

=====正文社=====

首先由踼過嘅球隊開始

左:Mech Soc FC (2015)
右:Band Soc (2016)

背號

其實真係要數 應該要由中學件PE衫/班T開始計

不過算唔上係球隊

返黎正題 話說當恩哥係first year 嘅時候

曾經踢過Mechan Soc嘅football team

所以就獲得人生中第一件波衫
雖然係Cotton會熱死…

(同埋跟英式應該寫last name LEE至啱…)

而右邊黑色嘅 就係second year

係過Band Soc football team幫手踢Society league
呢件係Polyester質料 輕身同透氣好多

但係兩team都係踼左一陣 就因為時間/完季關系無再踢

Btw number係亂揀嘅…

而身為紐粉ge筆者 就當然有返紐記ge波衫啦

左:2016/17 作客門將球衣
右:2015/16 作客球衣

筆者當有買過紐卡素主場球衣
不過送左比父親大人 所以而家係無存貨…

分享另外一件有趣嘅收藏: West Ham - The Boleyn Ground Special

印有The Boleyn Ground同1904-2016

球衣背面領位亦印有記念Logo

話說係位於東倫敦Upton Park嘅Boleyn Ground
由1904年起 就作為West Ham 嘅主場
一直到2015/16球季為止
因此 West Ham就推出左特別版球衣 以記念Boleyn Ground
筆者亦都同朋友去Boleyn Ground睇左主場對Aston Villa嘅主場比賽
因此買左呢件球衣

最後 既然住係英格蘭
少不了有返幾件英格蘭球衣傍身

左:英格蘭2014門將主場球衣
右: 英格蘭2016主場球衣

話說呢件衫當年買返黎我係著黎踢波…D漬洗唔甩

主場波衫入面嘅暗花Logo
應該係York Rose?

最後 就有呢兩件「踢波用」波衫

細節位做得靚

其實仲有其他幾件Sondico龍門衫
不過由於無咩特別 就唔係到分享啦

最後加單：

兩場都係生日波…一勝一和算係咁
可能England連一勝都無
上:Newcastle 125 Anniversary Scarf
中: 2016歐國盃分組賽G組 首循環 英格蘭vs立陶宛 (4:0)
下: 國際友誼賽 英格蘭vs意大利 (1:1)

=====後記=====

話說回想起四年前

同一班同係銅鑼灣iOne 睇世盃決賽
美斯繼續Missi 紐亞無扭啦
然後到加時 國師攻入全場唯一一球
協助德國捧走世界盃

食完個早餐
一班同學就行返學校 拎放榜成績
話說睇到綜合得1我係笑左出黎先ge
我仲幾快手去左對面(摩利臣山IVE)拎High dip offer

然後輾轉之間 就決定左黎英國讀書
又輾轉之間 四年又過 英格蘭又想踢四場
中國仲係未踢到世界盃 香港足球又再次發展
我亦都由中六畢業 去到預備黎緊八月Placement

有時人生就係咁 英格蘭對冰島 實食無痴牙啦
點知 一個足球小國 以英式足球擊敗你
好多野 輪唔到你控制
好多野 你估都估唔到

但係唔好框住自己
比D勇氣 踏出個步 你會發現
原來自己可以做到好多野
Well, 或者做唔到
但至少你試過

活生生例子如下：
筆者所有識玩嘅樂器
都係英國學(牧童笛除外)
包括:Bass, 木結, Cajon,Irish whistle(?)
外加60bpm單音/簡單配chord鋼琴(這不算吧)

Oh btw最近報左黑…足球裁判員課程(Referee)
同埋Food safety cert又3年要renew了…

最後：紐記龍門衫加燙字

=====結論=====

老媽睇到第一個反應大概係：做咩又洗左咁多錢…

提提各位(窮L)朋友
其實波衫季尾清貨/買上幾季平好多
我試過20鎊(~$200)or lower
買到香港吊緊你6/7/8百蚊嘅波衫(原價50鎊)
Sportsdirect d季尾discount又係顛…

P.S. 立陶宛幾年成日都抽中同England一組…
Euro 2016 G組, 世盃2018外圍賽歐洲F組…

P.P.S. 我估俄佬贏

P.P.P.S. 希望黎緊有多d時間可以寫Blog

在英國踩單車不可不知道的四件事

去到外國留學嘅好多朋友
都可能會考慮以單車代步
或者作為運動等等

但係 其實踩單車都有好多嘢要留意
你又知唔知？

以下筆者就同大家分享下係英國踩單車 要留意四件事情

一位朋友係筆者炒車後送嘅磁貼…

=====正文=====

1. 唔好?停！
正所謂有始必有終
單車都一樣需要停車
所以先會有制動裝置
亦即係我地俗稱嘅「逼力」(Brake)

以一般嘅單車而言 係需要有前後各一嘅制動裝置
呢個唔單止係法例要求(The Pedal Cycles (and Use) Regulations 1983)
更加係對你自己嘅安全保障

GCN嘅呢條片雖然係設計比公路車(Road bike)
但係大部份嘅內容同概念都適合一般單車使用

Fixie通常都顏色鮮豔…

最後你可能會問 咁Fixie(Fixed gear bike單速車)
同場地單車(track bike)又點呢？
場地單車如果係許可狀況下使用(場地比賽，指定場地等等) 係無問題嘅

而Fixie嘅Fixed gear wheel設計
由於後輪並無Free wheel
後輪同腳踏嘅關系係「你停我停」
咁樣已經符合左後輪制動裝置(Rear wheel brake)嘅要求
因此Fixie只要(最低限度)加返前輪制動裝置(Front wheel brake)
已經符合法例要求


2. 你睇我唔到 我睇你唔到
踩單車切記
而家唔係玩緊捉迷藏
"If you can't see the driver, they can't see you either"

筆者就曾經試過夜晚爭D撞到無燈無反光衣嘅Cyclist
根據Highway code Rule 60:
"At night your cycle MUST have white front and red rear lights lit. It MUST also be fitted with a red rear reflector (and amber pedal reflectors, if manufactured after 1/10/85). White front reflectors and spoke reflectors will also help you to be seen. Flashing lights are permitted but it is recommended that cyclists who are riding in areas without street lighting use a steady front lamp."

除此之外 根據The Pedal Bicycles (Safety) Regulations 2010
其實前白反光板亦都係法例部份要求
Supply of assembled bicycle 
4. (10) The bicycle must be fitted with—
(a) a wide angle retro reflector to the front; or
(b) a lamp to the front,
which is fitted in accordance with the requirements of the Lighting Regulations relating to an optional front retro reflector or an obligatory front lamp (as the case may be).

筆者個人做法係 除左安裝前後反光版
夜晚亦會加裝前白照明燈
同後紅單車燈
除左燈 筆者都會著反光衣(High vis jacket)
務求令自己有咁光得咁光

最後 單車鈴(Bell)都係重要嘅signalling device
令行人可以知道有單車接近
(雖然而家D人成日塞住對耳仔…)


3. 又威又要戴頭盔
雖然戴頭盔(Helmet)並唔係法例要求 保護性亦一直存疑
筆者仍然建議各位Cyclist要戴頭盔

Mayer Hillman於1993年所撰寫嘅"Cycle Helmets: The Case for and Against"報告
深入探討左呢個話題
佢嘅結論指出左幾個重點：
(節錄及修飾 建議大家閱讀原文)
1.配戴頭盔嘅作用並非在於意外預防(precaution)
而係為cyclist係意外當中提供一定程度嘅頭部保護(protection)
係同單車相關嘅致命同嚴重事故當中
頭盔所帶黎嘅保護作用其實不大

2.Cyclist反而可能因為「戴頭盔」就覺得自己好威威
而忽略同放鬆對路面狀況嘅警覺性
從而引至更多意外
無戴頭盔嘅cyclist反而可能有較高嘅警覺程度
而減少發生意外嘅機會

3. 從公眾角度出發 宣傳頭盔對安全嘅必要性
會降低公眾對使用單車嘅意慾
但推廣單車作為運動(exercise)同通勤方法(commute)
亦確實有助公眾健康水平成長

4. 就結論而言 報告並不支持硬性規定配戴頭盔
然而 (政府?)仍然應鼓勵配戴頭盔

最後 比起討論配戴頭盔與否
更重要係如何透過其他方法 去減低意外發生嘅風險
建議包括 建立完善單車配套/單車徑 以分開單車及車流
加設或調整速度限制
加強道路維修 以消除路面不平位置
使單車使用者能集中及警覺
而非分心以「閱讀」路面 等等

雖然Hillman先生呢份報告撰於十幾年前
數據已經過時 但係仍然符合現狀


4. 交通規則要遵守

除左裝備上 其實Cyclist都要遵守同汽車一樣嘅Highway code
單車並唔係邊到都行得

首先 一般行人路(Pavement)係禁止踩單車
同時危害行人同Cyclist自己嘅安全

其次 唔同類型嘅單車設施
都有唔同嘅使用守則

Segregated pathway範例

呢張係反面教材…睇唔到路面標記

上述兩張圖所示嘅 都係屬於Segregated pathway
Segregated pathway有圖示
清晰劃分比單車同行人專屬使用嘅空間

上：Shared pathway
下：Segregated pathway

專屬單車徑

Shared pathway則並無劃分
因此 各位行人同單車使用者都應該打醒十二分精神
留心周圍環境

使用專屬單車徑時都要打醒12分精神

Silvio Diego係一位Cyclist Youtuber
不時分享佢所經歷嘅路面狀況
大家可以由片段當中見到 險象橫生
不論係Cyclist 行人定係駕駛者 都要留意路面狀況
所以大家唔好以為落左路/單車徑就一帆風順
當時亦要注意路面狀況

題外話：倫敦嘅單車設施 的確比其他英國地方完善
但係同時風險都大 所以大家自己都要小心


除此之外 筆者亦建議大家認識多D關於道路使用嘅知識
因為仲有好多其他同單車相關嘅路面指示(Signs)
筆者在此會建議 UK AA Highway code for cyclist

£5真係值

英國汽車協會Automobile Association
早前就出版嘅呢一本指南
節錄Highway code (道路守則) 入面同單車使用相關嘅條文
以及其他一般道路指引
更加講哂筆者呢篇文嘅大部份內容(喂)
上網買只係£5

有興趣不妨買本傍身

另外一個快捷講解嘅網頁

Btw 其實呢條路係唔踩得單車架…

=====總結=====

其實要留意嘅點止四樣野呢？
踩單車仲有好多注意事項
但係希望大家唔好咁嚇親
而係嘗試去學習同應用

國家興亡 匹夫有責
道路安全 人人有責

=====推介=====

以下係幾個筆者推薦 關於踩單車嘅平台/資源

GCN-Global cycling network
GCN係由前專業單車手組成嘅Youtube channel
除左公路單車同相關嘅資訊
佢地亦會介紹唔同關於單車使用嘅影片
以下就係其中一條講 點樣係城市踩單車嘅片 希望幫到大家

P.S. GCN嘅英文清晰易明 亦係好好嘅學英文機會 大家可以嘗試下唔開字幕去聽

(翻譯真係唔容易…)(Btw佢地base係Bath)

=====反面教材=====

2016年2月 Mr Alliston係東倫敦Old street
駕駛一架Fixed gear 無前brake嘅track bike
以時速18英里/小時(約29km/h)撞倒一名44歲嘅母親Kim Briggs
Kim受到嚴重嘅腦創傷同頭顱骨折 終於一星期後不治
而Charlie辯稱 「有多個Front brake唔會有影響」「我有叫過佢行開」
以及並不知道 Fixed gear單車需要有前Brake嘅法例要求
(...claims having a front brake would have made no difference. (Independent, 2017))
(Alliston allegedly shouted at Briggs to “get out of the way” twice before their heads knocked together.(Guardian, 2017))

最終 係2017年8月法庭判決中
Charlie嘅「危險駕駛引致他人身體受嚴重傷害」控罪成立
(causing bodily harm by “wanton or furious driving”)
被判入青少年感化院18個月(...18 months detention in Young Offender’s Institution)
而誤殺(Manslaughter)控罪則不成立

呢一宗判決應該成為我地對單車安全嘅提醒

=====Reference=====

The Pedal Cycles (and Use) Regulations 1983
http://www.legislation.gov.uk/uksi/1983/1176/pdfs/uksi_19831176_en.pdf

The Pedal Bicycles (Safety) Regulations 2010
http://www.legislation.gov.uk/uksi/2010/198/pdfs/uksi_20100198_en.pdf

Sentencing remarks: R -v- Charlie Alliston
https://www.judiciary.gov.uk/wp-content/uploads/2017/09/sentencing-remarks-hhj-wendy-joseph-qc-r-v-alliston.pdf

關於Charlie Alliston一案嘅新聞報導
http://www.bbc.co.uk/news/uk-england-london-40960346
http://www.independent.co.uk/news/uk/home-news/dangerous-cyclist-charlie-alliston-front-brake-no-difference-kim-briggs-death-east-london-old-street-a7898496.html
https://www.theguardian.com/uk-news/2017/aug/23/ex-courier-charlie-alliston-convicted-for-mowing-down-kim-briggs-on-his-track-bike
http://www.bbc.co.uk/news/uk-england-41306738

=====Special Thanks=====

Thank you to Silvio Diego for allowing me to embed one of his video to explain risks and pedestrian behaviour to cyclist safety.
There are more video record in his channel to shows how brilliant some road users could be, check this out!
Silvio Diego: https://www.youtube.com/user/nimenta

[長文] 論《議事論事》之議論之事 [多圖]

我都唔知改咩標題好唯有似模似樣咁寫返個吸下睛(○)
希望第一次到訪嘅朋友唔好嚇親
本人嘅其他文章通常都比較輕鬆(好似係除非唔係)

=====分隔線=====

前言

筆者盡量唔寫關於政治議題嘅文章
原因並非因為「我唔講政治架」
而係一講就停唔到
同埋往往都要大量嘅背景資料
有時實在係無時間去搜集
同埋文字 比起面對面講 表達內容少不免會打折

然而 最新一輯嘅議事論事
卻令小弟不得不偶然動筆
揮Keypad疾書(九方嘛)

首先申報一下自己嘅立場
你問我身份認同 我會答你我係香港人

要以現今嘅政治光譜而言
我諗我個人立場偏向本土派
但港獨議題上 我並不支持 亦不反對
歸英雖好 但現實不可行

其次我偏向溫和派
並不鼓吹暴力抗爭 但係現今政治環境之下
單以和平手法表達訴求
政府係唔會理你 (umm中間偏右？)

其次 筆者最近並無留意香港嘅政治環境同事件
所以如果內容有所缺漏 敬請各位提點

以下文章為個人見解
主要集中係 第一集：「香港是否走向威權法治？」特輯
第二節嘅內容 (議事論事Facebook專頁 9分鐘半 影片)

=====分隔線=====

正文（一）

較早前 律政司係爭議之下
先後向反東北案 及衝擊公民廣場案提出覆核
最後法庭判決加重刑罰 十六名抗爭人士改判入獄
有輿論因而質疑 香港是否進入「威權管治」時代？
特輯第一節就採訪左部份受判決影響人士同政黨
當中包括前立法會議員 梁頌恆 以及 社民連
第一節唯一想回應嘅係梁頌恆提到
青年新政嘅路線為議會路線
亦即透過爭取議席
奪取資源 以及係議會對抗「保皇黨」及政府方面
非建制多一席 就代表建制派嘅資源同勢力被削弱
然而 議會路線本身亦需投入大量資源
以及好高嘅變數同風險

然而 當梁頌恆咁講 我就不禁諗
其實呢條路唔係你自己封嘅咩

當然宣誓風波當中
人大釋法絕非一般法律程序所考慮同顧及 (關於法律程序 陣間講少少)
然而 眼光放長遠點 你宣誓後
五年任期內 你點玩都得
而家因為威五分鐘
而「被DQ」同面臨破產
我覺得 絕對係因小失大
(雖不認同但難免有人陰謀論「青政係鬼」)

第一節中兩者同樣都講出好重要嘅一點
就係抗爭係需要付出代價
小至金錢 時間 精力
大至受傷 被捕 入獄等等嘅法律責任
他日 呢一班為沉默唔想承擔代價嘅市民嘅代表都無法發聲時
究竟係咪就係「香港已死」之日？

最後 我睇到青政同社民連
事後取態卻兩個不同嘅方向
但係交返比大家自已睇
(詳細可以去官網睇返原片)

=====分隔線=====

正文（二）

講返本文正題嘅第二節
主持以「香港是否已步入威權管治的時代」作題
先由余若薇資深大律師 表達對威權(法治)嘅見解

簡單清晰嘅論點同立場

筆者先不答這個問題

基於個人對法律程序嘅認識同理解
稍提一下關於司法程序嘅問題
議員宣誓案及人大釋法(釋法呢家嘢 可圈可點)
及 律政司對案件提請覆核

筆者覺得 基本上係符合程序 (先不提及人大主動釋法呢個外掛)
咩意思呢
宣誓案中被提呈嘅《基本法》第一零四條規定

香港特別行政區行政長官、主要官員、行政會議成員、立法會議員、各級法院法官和其他司法人員在就職時必須依法宣誓擁護中華人民共和國香港特別行政區基本法，效忠中華人民共和國香港特別行政區

問題黎啦 如何判定「…依法宣誓擁護…基本法…效忠中國香港特區…」呢
或者點樣先裁定為違反呢？

要講返2004年 原香港高等法院法官夏正民裁定
立法會議員在宣誓時需完整讀完誓詞
因此  理論上前後加料 都不影響誓詞法律效力
2012年 黃毓民在首次宣誓時 拒絕讀出「中華人民共和國香港特別行政區」全部字眼
被時任主席曾鈺成裁決無效
他在第二次宣誓時以大小聲讀出誓詞 終獲得接納
亦因此為議員可以二次宣誓而獲接納創先例

然而《第一零四條》並無實際提及
宣誓者能否於第一次宣誓不獲接納後
作第二次宣誓  及其法律效力
以及更改誓詞內容嘅處理方法

有時法律就係咁 留有空白想俾人空間
然而呢個空間 就係咩人都用得

所以即使黎到呢一刻
律政司越過界線向高等法院提出司法覆核 無視三權分立 不尊重立法會主席權力
以及人大係香港法院未提請之下主動釋法 不尊重香港法院嘅自主釋法權 影響司法獨立
程序上已經出現錯誤 有政治檢控之嫌
試問如果唔係你更改宣誓內容
又如何製造機會比人入呢？

另外 律政司覆核法庭判決 一般而言
律政司若認為判決刑罰未達阻嚇性或過輕
在其理據下提出覆核 實無不可

然而 以雙學三子重奪公民廣場案為例
雖然律政司表示 覆核申請係按法庭程序提出 確實合法
當時已接近完成社會服務令及緩刑期屆滿
律政司係曾被駁回下
以及內部官員不建議下仍要覆核
就顯得另有內情

如果重「奪」有暴力意圖 都要判入獄
按此理 「殺無赦」更應控以殺人未遂 恐嚇 等等…
(相信以上篇幅有對法律程序更熟悉嘅朋友可以作出補充同見解)

始終 法庭判決都取決於個別法官嘅睇法 難以一概而論
但筆者現階段仍然相信香港司法系統的公正性

假如法治程序無問題 究竟哪裡出了錯？

所以 究竟係咪好似何君堯所言
余若薇對法律和制度不認識
應該返去「再教育」？
將歪理當真理？

黑人問號.jpg

非也 先不論余若薇所講嘅係咪真理
反觀何君堯並無直接回應余所講 關於判決偏袒 律師會聲明 各方意見 等嘅論點
何君堯嘅發言欠缺連貫性
內容亦較主觀（失望，辭職建議）

反之余若薇 除引用時除出錯被曾鈺成提點外(求補充)
其實更顯出佢對法律同制度嘅理解
當然 律政司提請覆核係符合法庭程序規定
但係有無必要係被駁回同內部官員都不建議下堅持上訴？
還請客官自行判斷

而且何君堯更係理解出問題 嘗試將問題轉移
余著眼點不單係判決審訊本身咁表面 亦無貶低之意
佢所理解嘅 更係對於制度及如何運作嘅疑問
老實講 筆者眼見
除左人大釋法呢個不定時外掛
香港法律體系無咩大改動
司法程序亦一直維持運作
唯一會變更嘅 就只有人事
余若薇所指出嘅 係司法界人事
係一系列與政治有關嘅檢控同判決當中
所採取嘅手段同表態
難免令人感覺有欠公允
有政治檢控之嫌

亦為之後飛哥開聲舖下伏筆

何君堯用上"Go else where"
二至四行為余若薇之回應
但係 而家ge香港 又有無希望比下一代留低？

然後就到理大社會政策研究中心主任 鍾劍華 助理教授
講及社會制度問題
他表示 很多人已對制度表示不同意見
但當無法改變制度時
作為制度管理者嘅政府
可否「做好你份工」？

其後 鍾教授 用上雙重否定句(Double negative)
「我們不會不同意」 其實有正向肯定意思

亦表達出對政府運用法律同檢控工具嘅疑問
包括律政司覆核案及議員宣誓案

更重要係 議員被褫奪議席一事上

被DQ嘅 全部都係民選議員

反映社會似乎漸漸踏上「新加坡化」
或政府將運用司法去服務政治
市民係需要警惕

然而 呢個時候 何君堯忽然插入

呢個問題  與當時討論流程未見相關
及後亦未見有助建立任何相關論點
反而更突顯何君堯將複雜問題簡單 兩極化
同將「小學雞」嘅一面表露無遺 做成更大嘅分裂

鍾教授回應「我不支持港獨 一向都這樣說」
及後何君堯又追問

黑人問號2.jpg
何生 有好多嘢難聽過粗口呀
基督徒講「殺無赦」？
你係咪忘記左耶穌基督係十架上為每個人所流嘅血？

其實我相信鍾教授原本打算表達
言行舉止為學生個人取態 為其私人考量
但係何君堯咄咄逼人之下
便回答「我當然不支持」
何君堯之後再向余若薇問及支持港獨與否

你連討論空間都唔比
咪打壓越大 反彈愈大囉
Gas law都係咁啦

及後 何君堯嘅言論都彷佛係一個陷阱
想引你入「學生不應講粗口」「不應講粗口討論」
及筆者推斷可能引申至「港獨=廢青」嘅常見論述
然而 係一個充滿學者同有識之士嘅環境下
奸計自然未能得逞

曾鈺成都忍唔住

何君堯則無視 並嘗試將話題帶離

一指手指指別人
(最少)三隻手指指自己

最值得留意嘅 此時何君堯還氣勢逼人
叫別人先回答佢嘅問題 唔好「嘰嘰噶噶」

然後主持就將討論話題帶到至民主牆事件

…一些標語有冒犯性
也出現關於港獨的標語

而問及各嘉賓對大學處理手法嘅看法

(續)即使為標語 亦應以討論方式表達意見

其後 不知鍾教授是口快抑或如何
似乎意識到 民主牆有其獨特性
單純將標語遮蓋 並非善舉
反而以討論去表達意見更為適合

留意用字「有權處理」

其後 何君堯嘅行為同表現
更突顯其無知 運用不適當嘅例子以挑戰對方

何問：如有人在校園寫以上字句
鍾教授仍能接受嗎？

以下不解釋 學者技術性擊倒

認識歷史好重要

如果歷史同科研證實
一讀「港獨」題材地球水平面會上升1mm
咁你禁講就有道理啦…

「港獨」係一個目標(Goal/Result)
暴力/武力(你點叫都好)係一個達到目的嘅過程(Process)或手法(Method)
雖然就現今政治環境而言
若想達至港獨 和理非非係無可能
但係兩者不應捆綁混淆

然就我地一齊欣賞 前曾主席嘅太極手(誤)

問題係 部份玻璃心人嘅底線似乎高左D…

用字：「責任」vs「權利」
聽到呢到筆者有預感…

然後鍾教授就繼續闡釋納粹嘅例子

(我好似cap漏一句咁…)

然後一如筆者預料

曾鈺成打算借「德國不容納粹」 搬並出大中華論述 

以提出「一國兩制不留港獨空間」嘅意思

個個都大中華 唔通個個都想大中華咩
然而話中國（共）係香港祖國係歷史 主權上根本唔啱…

然後余若薇就問曾鈺成

關於大學處理民主牆事件嘅手法

只靠發聲明 並非透過大學領導層同學生 理性討論解決

而係以保安作擋箭牌

甚至有人提出聲討 解雇教授(暗指何君堯)

然而 曾鈺成亦叫余若薇要公道點

因為事情發展至呢個地步

係由2013年有大學教授(指戴耀廷,陳建民)呼籲佔中

到衝擊校務委員會

曾生你D用詞…真有趣

原汁原味 關於辭退佔中發起人戴耀廷教授嘅討論

（我慳返啖氣拎去跑步算…）

未知係飛哥叫停Jasper先
還是飛哥見Jasper開始講得眉飛色舞 先嗌停佢?

然後整個節目比較少出聲嘅李鵬飛先生就發聲了

筆者亦都認為係成個特輯最重要同好睇嘅一段

原汁原味

筆者問號.jpg

不能同意更多

曾鈺成都忍唔住抽下水

唔單止係部份「港獨派」
更係指…
(余若薇都點頭讚成)

一針見血
此時 何君堯仲要死撐

曾鈺成：食住花生等睇戲.jpg

節目嘅最後

=====分隔線=====

結論
各位嘉賓嘅表現 相信大家自有眼睇
搵黎曾鈺成做主持 的確係適宜之舉
因為佢大概係各方人馬都會願意交流嘅對象
至於大中華…
筆者明白但不認同

學者同資深大律師
談吐間已經盡露其學識同風度

至於何生嘅言行 筆者無咩特別想講
相信各位明眼人已經心中有數

但係筆者想提點嘅係
觀音像一事 網民都紛紛指責何君堯作為基督徒有失見證
但係就咁睇報導 並無講明
尊像係屬於邊個嘅
如果係屬於何家長輩或親屬 而非何君堯本人呢？
各位切勿跟車太貼
當然 除非有朋友向何生求證
否則 呢個都只係假設

但係想提醒各方教會朋友 切勿跟車太貼 站在高地
卻忘記《聖經》嘅教導

你們不要論斷人、免得你們被論斷。
因為你們怎樣論斷人、也必怎樣被論斷。你們用甚麼量器量給人、也必用甚麼量器量給你們。
為甚麼看見你弟兄眼中有剌、卻不想自己眼中有梁木呢。
你自己眼中有梁木、怎能對你弟兄說、容我去掉你眼中的剌呢。
馬太福音7:1-4 (登山寶訓 不妨再讀)

另外 林鄭同飛哥口提嘅大和解小弟就未聽過
但我認同社會係需要和睦 而唔係分裂
社會上亦有人並非以和解為目的而提出討論同意見
而係漸漸將社會分裂 分黨分派
為個人利益而發聲

有人將複雜嘅議題
單純以二元對立去處理
然而 大和解並唔代表要將社會聲音統一
而係如何係包含各種聲音 意見嘅社會當中
求同 存異

一味地排斥異已 最終只會導致社會聲音不平衡
這樣 真的可以稱得上和解嗎？
定係你只係「和諧」左 那些你無法駁斥嘅意見？
你所懼怕發生嘅事情？

無論係港獨 講粗口 警察執法
更多更多嘅議題 立場
漸漸 都只剩下非黑即白 非友即敵 二元對立
試問咁樣社會如何和睦？
好多事情 人根本無足夠嘅視野同能力去判決對錯
或者應該問嘅係 需要分對錯嗎？

有時候 事情嘅對錯或者是非 決定的確重要
但係如果為左堅持己見而影響人際
到最後 「贏左場(嗌)交 輸左個____ 」(自己填：家/家人/朋友/老婆/老公/同事/子女)
值得咩

無錯 社會應該致力和解
但係唔同議題 立場上
面對唔同嘅聲音同意見
應以理性去討論
而唔係以逃避 批評(criticise) 惡意中傷等去處理
討論亦毋須以說服別人為目的
討論唔一定有結果
單單嘅交流 有時已經好足夠

=====分隔線=====

後記

呢篇Blog總共用左差不多10小時
除左cap圖同打字
仲要睇返唔同嘅片
因為原本成個節目係Facebook ge直播
所以特輯本身並非原汁原味
其他片段亦都有各自可以討論嘅位置
但係今次我盡量將焦點放係第二節嘅9分半
我亦都建議大家盡量睇足所有影片

唔少時間都係用於修改何補足內容
出文時已經係第三次覆稿

知識係現今世代更為重要
好似哈佛大學校長Drew Faust於開學致辭中(Freshman Convocation Address to the Class of 2021)
引用已故前藝術與科學學院院長Jeremy Knowles所講
高等教育(Higher education)嘅重點

...it was, he said, to ensure that graduates can recognize when “someone is talking rot.” You learn this through challenging and being challenged, through being confronted by disagreement and difference and amidst it all finding your way.

「確保畢業的學生能分辨有人在胡說八道…並在面對各種分歧和異議中找到自己的方向。」

=====Reference 參考=====

http://www.rthk.hk/tv/dtt31/programme/legco_review/episode/458674
https://www.facebook.com/legcoreview/videos/1475542665834353/
http://www.inmediahk.net/node/1030608
https://zh.wikipedia.org/zh-hk/%E9%A6%99%E6%B8%AF%E7%AB%8B%E6%B3%95%E6%9C%83%E5%AE%A3%E8%AA%93%E9%A2%A8%E6%B3%A2#.E7.AC.AC.E4.BA.8C.E6.AC.A1.E5.AE.A3.E8.AA.93
http://hk.apple.nextmedia.com/news/art/20170817/20124094
https://www.harvard.edu/president/speech/2017/freshman-convocation-address-to-class-2021
https://www.thenewslens.com/article/79306

=====   (╯°Д°)╯ ┻━┻   =====

預告
朋友G：寫D relax D ge blog la
筆者：我都想Relax咁寫D relax D ge文 但係我忍夠啦我要寫單車安全用道路使用嘅文呀呀呀

===== 四千六百字完 =====

免責聲明

本網誌為非商業用個人網誌

本網誌為分享個人意見之用

本人並非上述內容之版權持有人

(內容文字 排版 知識產權 除外)

如版權持有人提出 本人會在減低對文章內容影響之狀況下

修改及/或移除本文章及其內容