14/4/2014

[DSE] 數學獵人之任務+同學重聚

前言
今日黎到DSE最後一科考試 數學
雖然本人係讀理科嘅 數學成績卻…
嗯…我去到Mock Exam先識直線方程同圓方程
考DSE個時先識做線性規劃同cosine theorem都算唔錯啦…
(心聲:讀理科讀到你咁都真係死得…)

雖然係咁嘅本人都係數學前有做數同背式嘅
(雖然用到就無幾多條)
而我認為最重要嘅都係瞓好個覺
精神好腦轉數都快D 就算唔記得式都可以諗到點做(真的)
(好孩子不要學)

P.S. 今篇文會包含術語或者只有筆者同學先知嘅梗,睇唔明嘅係你係無需擔心嘅
(我往後會係日常文盡量避免架啦)
-----------------分隔線-----------------
今日筆者嘅Look係
…手機前置鏡頭果然不行呢…
筆者好鐘意UNIQLO嘅一點就係好多合作Tee
佢本身D衫/褲又有質素(喂)
呢件就係MH4 x UNIQLO出嘅MH Tee
其實筆者早係P3合作個批已經想買 (雷狼龍個件好型呀)
但最終無買  如果有朋友知邊度仲有麻煩話聲我知 (類似嘅照收)

嗯所以可謂今日筆者係心態上係接下左討伐任務:
契約金: 378港元
討伐對象:數學卷 兩份
Cal機限定
失敗報酬: 出年見

但係筆者係入場前就先接到個採摘任務
事關係朝早未入試場之前嘅時段
「啪」
我望一望地下 大大部電話係度 但係無人執
於是走去問下個度附近D人
「Er…你係咪跌左部電話呀? 」「無wor」
「部電話係咪你架?」「唔係呀」
於是我按下○掣 交還紅箱攞報酬
於是我執左佢交左比學校校務處
後來問返員工就知道已經物歸原主了

嗯請好好保護你嘅手機 並非每一次都有人咁好心
(如果唔係某人就會有New Balance着架啦 >_<)
-----------------分隔線-----------------
係完成呢個採摘任之前呢 筆者就遇返幾個小學同學
嗯我係認得一個同學先嘅 因為樣貌同身高都無咩點變
然後佢又見到另一個同學 (之後再見到另一個)
但係筆者必須要講句…
對唔住我錯啦!(土下座)
我初頭完全認唔到 應該話用左些許時間先能夠將今日見到嘅樣同印象連起
(好吧我認人好差)

嗯轉眼時間黎到第一節考試後
整體而言卷一唔難 同2012感覺上都相差不遠
但係筆者有d題目係連搏步驟分都唔夠時間
(好吧我該做數了…)
身邊讀理科/M1嘅朋友表示輕鬆

咁即係卷二相對會較難啦
嗯…以MH嘅角度黎講筆者就係兩貓車先斬得死
人話就係:識D唔識D
甲部都還招架得住 乙部等GG
仲要我數到四個option係12.13.9.11之類(應該係12.11.11.11嘅平均分佈)
(過左去就唔好理咩Dick H_ _ 對答案啦)
-----------------分隔線-----------------
完左之後就同小學同學食飯啦
原先同學打算去一間泰式餐廳
點知無開LOL
最後係就去左一間Cafe食
雖然叫做Cafe 我覺得係一間有嘢食嘅Star_uck
同學秒鎖左一個combo之後 筆者繼續同選擇困難症嘅爭鬥
最後揀左佢個早餐
(其實有時間我覺得Lunch食早餐嘢食都幾好 前題:全日供應)
有D嘢已經被我食左 =P 之後先醒返起要影相
補充下 佢個"Jumbo" Combo就有:
腸一條
Fish Finger一隻
雞扒&魚餅(?)
例牌嘅薯餅
粟米(遮住左)
半個Muffin(…點解係半個)
早餐靈魂嘅蛋
同埋杯咖啡(本身叫Cuppacino,但話無最後要左Latte)
本身筆者因為價錢嘅關系都稍為有所期待
但係始終都要送大家一句
相片只供參考 請以實物為準
(嗯好吧你也可以說誰叫你有期望而出現落差而失望)
食完其實唔係好飽,但係油膩導致嘅滯就會令你唔想再食嘢
雖然本人唔係咩咖啡達人 但係杯咖啡可謂救起左個早餐XD

所以如果呀媽問我…
媽:食左咩呀?
我:係Cafe食呀 四十幾蚊
媽:吓?食咩呀
我:買咖啡送早餐呀…

另外一樣我最想吐糟嘅係
呢隻唔係玩具煮飯仔個隻膠太陽蛋
係Cafe出黎嘅蛋 點解我要用力咬嘅?

…筆者比個心得大家 麥記D炒蛋撞正佢地新鮮炒起嘅時候
質素絕不比咩翠O同澳O差(落小小黑椒正)

-----------------分隔線-----------------
早餐就假嘅 同小學同學吹水敘舊就真
首先大家都覺得係嘅 人係向前走嘅 大個左好多野唔同左
(然而筆者嘅髮型同佢嘅身高依然係十年不變)
最顯著係同學好多都各散東西 上左中學又大不同
以往讀書好同家庭有能力嘅大多已經將子女送去外國
以前我地眼中嘅讀書人卻熱衷於Custom Left 4 Dead場
有D好朋友甚至大打出手 感情缺口難以補全
嗯雖然要再一次道歉本人對部份名都無印象
但係傾計過程以前「小學雞」生活卻像嘅走馬燈一樣F5一次
不知各位基恩6A嘅同學還安好嗎?

希望大家好好珍惜身邊嘅同伴

Btw 永信你還好麼?

如是者傾左個幾鐘之後就離開Cafe
各自踏上歸家嘅路程
筆者就拎住杯未飲完嘅咖啡漫步人生
不知自此一別 到何時才能再會?

-----------------分隔線-----------------
後記
你估你真係讀文科嘅咩? 你讀中文炸!
小學同學話我似文科生 估唔到我係全理人(甚至3x理科)
筆者一向唔擅長抒情文 (6年中學都未寫過一篇)
但係黎到呢一刻卻好多感觸

講咩都無用後日考Physics快D溫會有2

-----------------分隔線-----------------
 後後記
前晚有篇文好夜先出 有D朋友可能無留意到十分抱歉 我會推返早個時間架啦
今次呢篇文打足成粒鐘先完稿…
…莫非我係偽理科真文科??(誤)
最後補充 其實小學同學有高到嘅 不過我高得多過佢姐
無高過? 幻覺黎嘅 嚇我唔到嘅…(被打)

7 則留言:

  1. 留名睇你咁有自信,數學拎level 5

    回覆刪除
    回覆
    1. 大佬又係你?好呀承你貴言 祝你攞35分!

      刪除
    2. 佢唔係我黎架

      刪除
    3. 邊個打邊個呀 留個名都好wor XD

      刪除
    4. 我唔係佢黎架

      刪除
  2. wa 隻蛋真係好似有層膠模包住咁==

    回覆刪除
    回覆
    1. 我相信呢隻係我食過最韌嘅蛋

      刪除

你的每一字 每一句 都是我的源動力
(係留言下面加個花名 等我記住你吖)